Integrimi në BE, Hatke: Procesi të shërbejë për qytetarët jo për fushata

Integrimi në Bashkimin Europian mbetet ende si koncept për qytetarët shqiptarë. Kjo duket se është edhe si efekt i mënyrës që raportohet në media për procesin ku nga një monitorim i shtypit të shkruar rezulton se vetëm 18 për qind e artikujve janë të thelluar. Për Frank Hatke, integrimit deri më tani i mungon një politikë reformuese që prek jetën e qytetarëve.

“Integrimi në Bashkimin Europian është prioritet sepse duhet të rrisë standardin e jetesës dhe sigurinë sociale të qytetarëve nga një politikë reformuese reale që nga këndvështrimi im në fakt mungon. Integrimi në Bashkimin Europian nuk është të shkruarit të studimeve, dokumenteve apo debateve ideale, jo letërsisë apo talk-show-ve, por implementimi i zhvillimit që ka nevojë jeta e përditshme. Dhe sigurisht një diskutim sa më kompetent për integrimin europian është shumë i rëndësishëm për të përfunduar si një joshje vetëm për fushata elektorale. Në fund kemi nevojë për hapa të konsoliduara për përmirësimin e gjendjes së qytetarëve në Shqipëri dhe jo për artikuj sipërfaqësor”.

Reforma në Drejtësi nuk ka munguar pa u bërë pjesë diskutimi. Përfaqësuesi i Bashkimit Europian, Sylvian Gambert e lidhi atë edhe një herë me integrimin duke theksuar se media duhet të bëjë të qartë këtë aspekt

 “Kur bie fjala tek reforma në drejtësi dhe Vettingu që është një reformë model ka pasur gjatë javëve të fundit një fushatë të koordinuar që ta deligjitimojnë procesin, të bllokojnë Vettingun dhe për mua si një i sapoardhur në Shqipëri është e habitshme të shoh metodat që janë përdorur sa i përket vënies në pikëpyetje qëllimet e partnerëve ndërkombëtarë apo vënia në dyshim e personalitetit për individë të caktuar. Por kur vijmë tek integrimi europian kjo nuk është njëlloj. Integrimi europian ndërtohet në një dialog institucional që dakordësohet nga të gjithë qartë dhe hapur për kushtet. Fakti që Vetting është një parakusht për të ecur para me negociatat, është diçka që Bashkimi Europian e ka thënë kohë më parë ndaj kushdo që është kreu i delegacionit apo komisioneri në Bruksel apo kushdo që është kryeministër këtu në Shqipëri është e parëndësishme, pasi është një institucion dhe proces që është aplikuar në vende të tjera ndaj është roli i medias që të qartësojë këtë pjesë.”

Deklaratat u bënë gjatë prezantimit të gjetjeve të një monitorimi, të zhvilluar nga EU Policy Hub, Fondacioni Fridrich Ebert dhe Fondacioni Shoqëria e Hapur për Shqipërinë për pasqyrimin e çështjeve të integrimit në median e shkruar.

Nertila Maho/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.