Interesat negative të BQE – Draghi: Nuk kanë ndikuar në përfitueshmërinë e bankave
Presidenti i Bankës Qendrore Europiane, Mario Draghi, tha se norma negative e interesit për depozitat nuk ka pasur ndikim në përfitueshmërinë e bankave, duke përforcuar vendimin e fundit për të mos kompensuar huadhënësit për normat rekord të ulëta të interesit. Megjithatë, Draghi shtoi se ndikimi i interesave negative ndryshon gjatë kohës, kështu që Banka Qendrore Europiane do të monitorojë përfitueshmërinë e bankave, çka lë hapur mundësinë për një kompensim.
Huadhënësit janë ankuar se interesat negative kanë tkurrur marzhet e tyre, duke penguar aftësinë për të dhënë hua, çka bie ndesh me vetë stimujt e Bankës Qendrore Europiane. Një zgjidhje e diskutuar fare pak nga politikëbërësit këtë muaj, mund të jetë një normë interesi për depozitat me disa nivele, që do të përjashtojë një pjesë të rezervave të tepërta të bankave nga 0.4%-shi që i ngarkon institucioni në Frankfurt.
“Ndikimi negativ te marzhi neto i interesave është kompensuar nga përmirësimi i perspektivës ekonomike, që ka sjellë rritjen e totalit të kredive dhe përmirësimin e cilësisë së kreditit, ç’ka ka ulur kostot e provigjonimit”, tha Draghi.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.