Interneti shqip – Afro gjashtë mijë adresa të reja në 2017
Adresat e internetit të regjistruara në Shqipëri kanë kaluar 20 mijë njësi. Autoriteti i Komunikimeve Elektronike dhe Postare bën të ditur se gjatë vitit 2017 janë regjistruar afro gjashtë mijë domaine të reja në zonën “.al”.
Megjithatë, një numër i konsiderueshëm domainesh nuk janë rinovuar dhe kjo ka bërë që numri i domaineve aktive të rritet me rreth dy mijë njësi ose rreth 11% krahasuar me fundin e vitit 2016.
Liberalizimi i regjistrimit të domaineve në zonën “.al” ka sjellë edhe një degë të re biznesi për shoqëritë e sektorit të teknologjisë së informacionit dhe komunikimit. Nëse dikur regjistrimi i domain ishte monopol i AKEP, tani kjo procedurë mund të bëhet edhe nga shoqëritë private. Në fund të vitit 2017, ishin shtatë kompani të akredituara nga AKEP për ofrimin e këtij shërbimi.
Regjistrimi fillestar i një domaini bëhet për një periudhë pesëvjeçare, për të cilën çdo regjistrues parapaguan në AKEP një tarifë prej pesë mijë lekësh. Shërbimi i regjistrimit të domaineve mund të ofrohet nga çdo kompani e teknologjisë së informacionit dhe komunikimit, duke u akredituar më parë në AKEP. Regjistruesit paguajnë tarifë fikse prej 100 mijë lekësh në vit, si edhe një tarifë akreditimi prej 20 mijë lekësh, që paguhet vetëm një herë.
Ersuin Shehu/SCAN
Uria e shqiptarëve për megabyte – Trafiku i të dhënave u rrit me 12.8%. Zëvendëson telefonatat dhe mesazhet
Sa e përdorin ndërmarrjet shqiptare kompjuterin, internetin dhe opsionin e shitjeve online?
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.