Intervista në “France 24” – Rama: Çelja e negociatave nuk i kushton asnjë qindarkë Evropës
Në një intervistë të gjatë për Televizionin “France 24” Kryeministri Edi Rama ka komentuar ngjarjet e fundit në Shqipëri si dhe procesin e çeljes së negociatave me Bashkimin Evropian. Ai tha se rekomandimi i dhënë nga Komisioni Evropian për çeljen e negociatave është një tregues i qartë i hapave që ka bërë Shqipëria për përmbushjen e kritereve për anëtarësim, ndërkohë që nënvizoi se negociatat nuk i kushtojnë asgjë Evropës, pasi rrugëtimi drejt integrimit është shumë i gjatë.
“Kemi shumë rezultate që janë themelore, se ndryshe KE nuk do të bënte rekomandimin për çeljen e negociatave me Shqipërinë. Nga ana tjetër jemi të ndërgjegjshëm se ka ende për të bërë. Nuk është se jemi duke trokitur në dyert e BE-së për tu bërë anëtarë, jemi duke u përgatitur për hapjen e negociatave të cilat do të vazhdojnë shumë vite për të vendosur në jetë të gjithë reformat e nevojshme dhe përmirësuar nga pikëpamja e ligjvënies. Nuk kërkojmë para nga Europa. Negociatat nuk i kushtojnë asnjë qindarkë Europës. Janë rrugëtim për të vazhduar drejt reformave, janë dhe inspektime për të parë nëse ne i kemi përmbushur apo jo.”
Rama i ka konsideruar zhvillime normale të brendshme protestat e fundit të opozitës kundër Qeverisë dhe jo një ngjarje që duhet të zërë faqet e para të gazetave. Ai nuk pranoi të komentonte qëndrimet e opozitës, por tha se në Shqipëri ndodh shpesh që të kërkohet dorëheqja e Kryeministrit.
“Nuk është një lajm që duhet të zërë faqet e para të gazetave ndërkombëtare. Është jeta e brendshme e vendit, opozita është duke protestuar dhe ka një qeveri që është në fuqi. Të kërkosh dorëheqjen e kryeministrit në Shqipëri kjo ndodh shpeshherë që kur jemi futur në demokraci. Nuk flas për opozitën, është jeta demokratike Shqipërisë. Shqipëria ka parë manifestime më të mëdha, kjo është jeta demokratike e vendit dhe është normale”.
Kryeministri Edi Rama ndodhet në Francë në kuadrin e një turi lobimi për çeljen e negociatave me Bashkimin Evropian.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.