Intesa Sanpaolo nis tregtimin në ALSE – Në muajin shtator pritet edhe një anëtar tjetër
Intesa Sanpaolo Shqipëri ka nisur të mërkurën tregtimin në Bursën Shqiptare të Titujve, ALSE. Banka me kapital italian u anëtarësua pranë ALSE në maj të këtij viti, për tregtimin e letrave me vlerë të Qeverisë dhe është anëtari i katërt i Bursës ALSE dhe tregton me të drejta të plota së bashku me Credins Bank, Bankën Amerikane të Investimeve dhe Triumf Grup.
Anëtarësimi i njërës prej bankave më të rëndësishme të sistemit dëshmon një interes dhe besim në rritje të tregut te bursa.
Shumë shpejt, në bursë pritet të anëtarësohet edhe një firmë tjetër brokerimi. Në muajin korrik, Autoriteti i Mbikëqyrjes Financiare licencoi Agora Securities për ushtrimin e veprimtarisë së brokerimit në tituj, pranë bursës ALSE.
ALSE nisi aktivitetin në shkurt të vitit të kaluar, me tregtimin e titujve të borxhit të qeverisë shqiptare. Për 6-mujorin e parë të këtij viti, volumi total i tregtimit arriti në afro 1.5 miliardë lekë, i dominuar kryesisht nga transaksionet me obligacione.
Që nga shkurti i këtij viti, ALSE është ligjërisht e licencuar edhe për tregtimin e titujve të shoqërive private. Në praktikë, tregtimi pritet të mundësohet në vjeshtë, pasi të jenë plotësuar disa kërkesa ligjore dhe teknike të lidhura me regjistrimin e titujve, ALREG, hallkë e domosdoshme për të kryer transaksione të letrave me vlerë nga emetues privatë.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.