Investime në periferi – Veliaj e Meta përurojnë rrugën e Çekrezës në Zall-Herr

Banorët e Çekrezës në Njësinë Administrative të Zall-Herrit tashmë kanë në dispozicion një rrugë të re me standarde e sinjalistikë rrugore, duke lënë pas infrastrukturën e degraduar.

Bashkia e Tiranës ka përfunduar ndërtimin e rrugës e cila i afron banorët, si dhe produktet bujqësore dhe blegtorale të kësaj zone me tregun e Tiranës.

Kryetari i Bashkisë së Tiranës, Erion Veliaj, i shoqëruar nga kryetari i Kuvendit, Ilir Meta, përuruan rrugën e re të Çekrezës, ndërsa inspektuan edhe dy nga rrugët e tjera që po ndërtohen në këtë zonë.

Kryebashkiaku Veliaj theksoi se falë reformës territoriale është bërë e mundur realizimi i një sërë investimesh të rëndësishme, jo vetëm në zonat urbane, por edhe në zonat rurale.

Veliaj shtoi se nuk do të ketë asnjë dallim në shpërndarjen e investimeve midis qendrës dhe zonave rurale.

Nga ana e tij, Kreu i Kuvendit, Ilir Meta vlerësoi punën që po bën Bashkia e Tiranës jo vetëm në qytetin e Tiranës, por edhe në integrimin e zonave rurale, ku theksoi se Tirana duhet të jetë shembull edhe për bashkitë e tjera.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.