Investime në ujin e pijshëm, Veliaj: Linjat e reja, furnizim për 7816 banorë për 25 vite

Zona përballë ish-uzinës së Autotraktorëve, nga Shkoza e Sipërme deri në Lanabregas, do të ketë një rrjet të ri ujësjellësi dhe kanalizime të ujërave të zeza. Bashkia e Tiranës dhe UKT kanë nisur investimet që do të sjellin përmirësim të cilësisë së shërbimit dhe të furnizimit me ujë të afro 4 mijë banorëve që jetojnë në një zonë.

Kryebashkiaku Veliaj theksoi faktin se investimi do të ndikojë direkt si në furnizimin më të mirë me ujë të banorëve, ashtu edhe në menaxhimin e situatës së ujërave të zeza dhe të bardha në kohë shirash. Kryetari i Bashkisë së Tiranës, Erion Veliaj u ka bërë thirrje qytetarëve që të tregohen të përgjegjshëm në përdorimin e ujit të pijshëm në këto ditë thatësire, si dhe ta kursejnë atë.

Bashkia e Tiranës dhe Ujësjellës Kanalizime Tiranë kanë ndërmarrë dy projekte të ndërtimit të rrjeteve të rinj të ujësjellësit dhe atij të kanalizimeve në zonën e Shkozës së Sipërme deri në Lanabregas, që përfshin një sipërfaqe deri në 53 hektarë.

Linja e re e ujësjellësit do sigurojë një furnizim për 7816 banorë për një periudhë 25 vjeçare. Linja e re e kanalizimeve është projektuar me katër kolektorë, të cilët mbledhin ujërat e zeza dhe ato të shiut.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.