Investimet e bankave – Dominojnë instrumentet me rrezik të ulët
Sistemi bankar edhe këtë vit ngelet i orientuar më shumë drejt investimeve me rrezik të ulët. Sipas të dhënave nga Shoqata Shqiptare e Bankave, në fund të tremujorit të tretë të këtij viti rritja e aktiveve të bankave është përqendruar tek investimi në letra me vlerë dhe te vendosjet në banka të tjera.
Investimet e bankave në letra borxhi, kryesisht të qeverisë shqiptare, arritën vlerën e afro 425 miliardë lekëve, rreth 1% më shumë krahasuar me të njëjtën periudhë të një viti më parë. Rritje më të lartë kanë regjistruar fondet e vendosura në banka të tjera, që arritën në 258 miliardë lekë, 4% më shumë krahasuar me të njëjtën periudhë të një viti më parë.
Vendosjet konsistojnë kryesisht në fonde të depozituara në banka të tjera jashtë vendit. Kjo vlen sidomos për likuiditet e lira në valutë të huaj, për të cilat nuk ekzistojnë shumë mundësi investimi brenda vendit.
Nga ana tjetër, portofoli i kredisë, ngelet në rënie. Sipas Shoqatës së Bankave, në fund të shtatorit 2017 stoku i kredisë dhënë nga sistemi bankar arriti në 572 miliardë lekë. Krahasuar me të njëjtën periudhë të një viti më parë, portofoli i kredisë është në rënie me 28 miliardë lekë ose rreth 4.7%.
Këto shifra, që gjithsesi janë operative dhe të paaudituara, japin një rënie më të lartë në raport me të dhënat e përgjithshme të kreditimit që publikon Banka e Shqipërisë. Sidoqoftë, në tkurrjen e portofolit të kredisë një ndikim të konsiderueshëm ka pasur procesi i fshirjes së kredive të humbura. Pavarësisht nga kjo, kreditimi ende është i zbehtë, për shkak të pasigurisë nga krahu i kërkesës, por, edhe të një qëndrimi konservator të bankave, sidomos në segmentin e biznesit. Për këtë arsye, sistemi bankar ka zgjeruar investimet me rrezik të ulët në tituj.
Pavarësisht nga kjo, sistemi bankar këtë vit po regjistron fitime rekord, sidomos falë përmirësimit të cilësisë së portofolit të kredisë dhe rënies drastike të shpenzimeve për provigjione.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.