Investimet e diasporës në Shqipëri – Program 3-vjeçar, në fokus 500 mijë emigrantët në Itali

Diaspora shqiptare do të angazhohet për të nxitur zhvillimin social dhe ekonomik të Shqipërisë, duke ofruar dijet, praktikat dhe përvojat më të mira. Ky është edhe qëllimi i programit 3-vjeçar të financuar nga Koperacioni Italian,  i cili do të fokusohet kryesisht në diasporën shqiptare në Itali, ku jetojnë rreth 500 mijë emigrantë. Programi do të mbështesë investimet dhe ngritjen e bizneseve të reja nga pjesëtarë të diasporës.

“Ky projekt që sot po lançohet ëhstë shembulli i një vullneti institucional që tregon se lëvizja e njerëzve nuk përballohet si një emergjencë apo kërcënim, por shihet në optikën afatgjatë duke transformuar emigrimin në mundësi zhvillimi ekonomik dhe shoqëror. Jam i bindur se shumë shpejt do shohim rezultate në të dy anët e Adriatikut dhe kam besim se me përfshirjen e të gjithëve dhe veçanërisht të qeverisë shqiptare këto rezultate do të ndahen nga të gjithë dhe do të perceptohen edhe nga opinion publik.”

Ministri i Shtetit për Diasporën, Pandeli Majko, i cilësoi shqiptarët që jetojnë jashtë vendit si pasuri e pa shfrytëzuar dhe bëri me dije disa iniciativa për emigrantët shqiptarë në të gjithë botën, të cilat synojnë edhe thithjen e investimeve në vendin tonë.

“Shpresojmë që brenda këtij muaji të bëhet vepruese Agjencia Kombëtare e Diasporës e cila ka kaluar që në dhjetor me një ligj të veçantë në Parlamentin e Shqipërisë. Besoj javën tjetër është future në rendin e ditës dhe po diskutohet në Komisionin e Politikës së Jashtme ligji ombrellë i Diasporës dhe ndërkaq në qeveri ka mbaruar dhënia e opinioneve dhe do të kalojë në Këshillin e Ministrave dhe projektligji për Fondin e Zhvillimit të Diasporës që do të ketë të bëjë me cilësinë e marrëdhënieve për sa I përket investimeve të Diasporës në Shqipëri.”

Rreth 1.4 milion shqiptarë jetojnë jashtë vendit, kryesisht në Itali dhe Greqi dhe me prani në të gjithë botën.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.