Investimet e huaja – Rritet pesha e ndërtimit dhe pasurive të paluajtshme

Investimet e huaja direkte këtë vit janë më pak të varura nga energjia dhe po shpërndahen më shumë sektorë ekonomikë. Kjo tendencë u konfirmua edhe në tremujorin e tretë të vitit, kur investimet në sektorin e energjisë ishin 65 milionë euro pothuajse në të njëjta nivele me tremujorin e dytë, por në rënie të ndjeshme krahasuar me të njëjtën periudhë të vitit të kaluar.

Ulja e ndjeshme e volumit të punimeve në gazsjellësin TAP dhe në HEC-et në kaskadën e Devollit ka sjellë në mënyrë të paevitueshme ndikim në shifrat e investimeve në energjetikë. Nëse për 9-mujorin e vitit të kaluar energjetika sillte pothuajse gjysmën e investimeve të huaja direkte, këtë vit pesha e këtij sektori ka zbritur në më pak se 33%.

Industria nxjerrëse vazhdon të jetë kolona e dytë më e rëndësishme e investimeve të huaja direkte. Për tremujorin e tretë, në këtë degë u investuan 58 milionë euro, në rritje për të tretin tremujor radhazi. Investimet në këtë sektor i takojnë, në pjesën më të madhe, kompanive të angazhuara në kërkimin dhe nxjerrjen e naftës, Bankers Petroleum dhe Shell.

Sektorët që po shënojnë rritje domethënëse të investimeve të huaja për këtë vit janë ndërtimi dhe pasuritë e paluajtshme. Investimet në këto aktivitete arritën në 58 milionë euro. Degë tjetër që vazhdon të sjellë flukse të konsiderueshme investimesh të huaja është sektori bankar dhe financiar. Për tremujorin e tretë të vitit, këto investime arritën në 38 milionë euro.

Banka e Shqipërisë e vlerëson fluksin hyrës të investimeve të huaja për tremujorin e tretë të vitit në vlerën e 272 milionë eurove, në rritje si krahasuar me tremujorin e mëparshëm, ashtu edhe krahasuar me të njëjtën periudhë të vitit të kaluar.

Rol përcaktues në rritjen e investimeve këtë vit po luajnë fitimet e riinvestuara nga ndërmarrjet ekzistuese me kapital të huaj. Nëse investimet e reja në tremujorin e tretë pësuan rënie me 23 milionë euro, fitimi i riinvestuar u rrit me 28 milionë euro krahasuar me një vit më pare. Nga ana tjetër, baza më e diversifikuar sektoriale mund t’iu japë më shumë qëndrueshmëri investimeve të huaja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.