Investimet e huaja të përqendruara në katër sektorë

Investimet e huaja direkte për gjysmën e parë të këtij viti u mbështetën kryesisht te energjia dhe industria nxjerrëse, duke dëshmuar edhe njëherë përqendrimin e lartë të tyre gjatë viteve të fundit.

Sipas të dhënave nga Banka e Shqipërisë, sektori energjetik në gjashtë muaj solli 39% të totalit të investimeve të huaja. Investimet në këtë sektor në fakt i takojnë pothuajse totalisht gazsjellësit TAP, me afro 150 milionë euro të investuara në total.

Ndonëse ngelet kolona kryesore e investimeve të huaja, sektori i energjisë ka pësuar një rënie të peshës specifike krahasuar me vitin e kaluar, kur siguronte më shumë se gjysmën e investimeve.

Besohet se kjo lidhet kryesisht me dinamikën e punës në gazsjellësin TAP. Ajo që vërehet këtë vit është një rikthim i investimeve në industrinë nxjerrëse, me 106 milionë euro ose 28% të totalit.

Rritja e investimeve i detyrohet përmirësimit të çmimit të lëndëve të para dhe mbylljes së tranzicionit të shitblerjes në kompaninë më të rëndësishme të sektorit, Bankers Petroleum.

Sistemi financiar ngelet i rëndësishëm në fluksin e investimeve të huaja dhe për gjysmën e parë të këtij viti solli 13% të totalit. Ndonëse nuk kanë hyrë investitorë të rinj të rëndësishëm, investimet e huaja kanë arritur në 46 milionë euro, sidomos falë injektimeve të kapitalit nga aksionerët e bankave të huaja që veprojnë në vend.

Sektori i fundit me peshë domethënëse në investimet e huaja ishte ai i aktiviteteve profesionale, ku peshën kryesore e zënë sipërmarrjet call-center. Për 6-mujorin, ky sektor solli 42 milionë euro investime ose rreth 12% të totalit.

Investimet e huaja direkte po shfaqin një tendencë pozitive, por, megjithatë është fakt se ato ngelen të përqendruara në pak sektorë, madje në pak ndërmarrje, ndërsa prej vitesh mungojnë projekte të reja me rëndësi.

Ndonëse kjo lidhet edhe me pasojat e krizës në ekonominë ndërkombëtare, sërish Shqipëria nuk duket të ketë bërë shumë për të qenë një destinacion më joshës për investimet e huaja.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.