Investimet kineze në SHBA – Bien me 90% në gjysmën e parë të vitit prej presioneve politike
Investimet kineze në SHBA ranë me 92% në vetëm 1.8 miliardë dollarë në gjysmën e parë të këtij viti. Duke përfshirë shitjet e njësive dhe aktiveve në SHBA, fluksi neto gjatë kësaj periudhe rezultoi negativ në 7.8 miliardë, sipas një raporti të firmës së hulumtimeve Rhodium Group. Kjo vjen pas një rënieje të mprehtë në gjysmën e dytë të vitit të kaluar, ndërkohë që presionet nga Pekini dhe administrata e Donald Trump, kanë frenuar rritjen e investimeve përtej kufijve.
Marrëveshjet e përfunduara kineze në SHBA, shënuan një nivel rekord prej 46 miliardë dollarë në vitin 2016, duke rënë në 29 miliardë në 2017-ën. Në kërkim të mundësive për investim, kompanitë kineze ndërmorën një valë të blerjeve jashtë vendit në vitet 2015 dhe 2016. Tashmë, Kina kërkon të limitojë daljen e kapitalit dhe përdorimin e tepërt të levës financiare (financim me borxh). Shtetet e Bashkuara shqetësohen për mbrojtjen e pronës intelektuale dhe kanë rritur mbikëqyrjen në këto marrëveshje për motive të sigurisë kombëtare.
Trump ka kërcënuar kufizime në investime, bazuar nga i njëjti hetim që solli prezantimin e tarifave në importe. Për rrjedhojë, blerje kineze me një vlerë sipër 2 miliardë dollarëve në 5 muajt e para të këtij viti janë anuluar. Te këto përfshihet propozimi i njësisë financiare të Alibaba, Ant Financial, për të blerë MoneyGram. Konglomeratë të mëdhenj kinezë si HNA, Angbang dhe Wanda, kanë shitur shumë aktive që zotërojnë në SHBA, duke e çuar shumën totale të shitjes së zotërimeve në 5 muajt e parë të vitit në 9.6 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.