Investimet me financim të huaj – Realizim 5.4% për janar-prill në katër projekte

Katër projekte që financohen nga institucione të huaja kanë pasur një realizim total prej 5.4 për qind në katër muaj të parë të këtij viti. Të paktën kështu deklarohet në raportin e Ministrisë së Zhvillimit Urban për ecurinë e shpenzimeve të buxhetit.

Për vitin 2017 janë planifikuar 193 milionë lekë investime më financim të huaj por realizimi faktik ka qenë vetëm 10.3 milionë lekë. Ministria ka dhënë edhe detaje për secilin nga projektet.

I pari është ai për “Zhvillimin e integruar dhe të qëndrueshëm të zonës bregdetare, GIZ” ku të parashikuara janë 70.8 milionë lekë dhe deri në prill rezultojnë të realizuara vetëm 10.3 milionë lekë.

I dyti në listë është projekti “Hartimi i master planit në fushën e mbetjeve” i bankës gjermane ku janë parashikuar 46 milionë lekë. Aktualisht është nënshkruar marrëveshja nga qeveria shqiptare dhe banka gjermane si dhe me konsulentin.

Ministria e Zhvillimit Urban nënvizon se për projektin e tretë që lidhet me zhvillimin infrastrukturor dhe ekonomik të financuar nga Banka Botërore janë parashikuar 74.7 milionë lekë. Aktualisht është miratuar marrëveshja dhe zbatimi do të bëhet nga Fondi Shqiptar i Zhvillimit, por fondet e planifikuara do të rialokohen në një tjetër projekt.

I fundit është një projekt për banesat sociale me qira që financohet nga CEB apo Banka për Zhvillim e Këshillit të Europës ku janë parashikuar 1.5 milionë lekë. Kredia për këtë projekt përfundon në vitin 2017 dhe aktualisht për fazën e dytë janë lidhur kontratat me 126 përfitues të apartamenteve.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.