Investimet në Belsh – Furnizimi me ujë të pijshëm, projekti themelor për këtë zonë
Investimi në sistemin e ujit të pijshëm është edhe projekti kryesor që do të zbatohet në zonën e Belshit. Kjo u bë e ditur nga kryeministri, Edi Rama gjatë turit të llogaridhënies në Belsh. Rama deklaroi se do të fillojë një ndërhyrje e menjëhershme për zgjidhjen e këtij problemi të vjetër të banorëve të zonës.
“Belshi vuan edhe nga një problem shumë i vjetër, që është furnizimi me ujë të pijshëm. Edhe brenda qytetit furnizimi është i kufizuar gjatë ditës, por edhe në zonat rurale. Ajo që është akoma më e rëndësishme, kjo është një zonë që paguan rregullisht. Prandaj ne kemi folur edhe me kryetarin e bashkisë për të filluar një ndërhyrje menjëherë për të zgjidhur këtë problem. Sigurisht që kërkohet një investim i konsiderueshëm. Do të nisim investimin në sistemin e ujit të pijshëm dhe të ulim kohën e kufizimit të ujit të pijshëm”, u shpreh Rama.
Ndërkohë, më tej kryeministri u ndal edhe te rikonstruksioni i qendrave shëndetësore, ku sipas tij brenda viti do të rehabilitohen 80 të tilla, ndër të cilat disa prej tyre i përkasin zonës së Belshit.
Më tej, vuri theksin te masat e ndërmarra për biznesin e vogël, duke cilësuar si domosdoshmëri futjen e tyre në regjimin e TVSH-së.
“Së shpejti do të marrin edhe një masë për biznesin e vogël. Futja në sistemin e TVSH është një domosdoshmëri. Për të gjithë ata që kalojnë pragun prej 80 mln lekë xhiro në vit ndodh kalimi nga taksa 5% në 15%. Ne duam të lehtësojmë këtë kalim duke rritur pragun, duke iu thënë të gjithë bizneseve që taksa e tyre deri në 140 mln do jetë vetëm 5%”, shtoi kryeministri Rama.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.