Investimet në DPSHTRR – Ecuria e punimeve në Drejtoritë Rajonale ku ka nisur rikonstruksioni
Drejtoritë Rajonale të Shërbimeve të Transportit Rrugor i janë nënshtruar rikonstruksionit prej disa muajsh. Projektet e ndërmarra në kuadër të ofrimit të shërbimit më të mirë për qytetarët janë në fazën e zhvillimit.
Sipas DPSHTRR, Drejtoria Rajonale Tiranë është në përfundim të punimeve. Ndërkohë, në Drejtorinë Rajonale Elbasan, e cila ka nisur procesin e rikonstruksionit në muajin prill të këtij viti bëhet e ditur se është realizuar 50% e investimit.
Përmes këtij investimi është parashikuar krijimi i një ambienti shtesë krahas godinës ekzistuese me qëllim krijimin e kushteve më të përshtatshme si për personelin ashtu edhe për shërbimin e qytetarëve.
Ndërsa, ka nisur puna edhe në Drejtorinë Rajonale Durrës për rikonstruksionin e sallës së drejtuesve të mjeteve dhe fasadave.
DPSHTRR njofton qytetarët se shërbimi do të vazhdojë pa ndërprerje paralelisht me rikonstruksionet e nisura.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.