Investimet në ekonomi në rritje edhe për tremujorin e parë 2017
Investimet kanë ndjekur një ecuri pozitive edhe në tremujorin e parë të këtij viti, mbështetur në ecurinë e disa prej treguesve kryesorë të tërthortë.
Sipas Institutit të Statistikave, për tre muajt e parë të vitit importi i makinerive dhe pajisjeve arriti në 28.9 miliardë lekë, në rritje me 5.9% krahasuar me të njëjtën periudhë të një viti më parë.
Një tjetër tregues i tërthortë, kredia bankare për investime paraqitet po ashtu në rritje për muajt e parë të vitit 2017.
Sipas Bankës së Shqipërisë, në fund të muajit mars, kredia për blerje të makinerive dhe pajisjeve nga bizneset arriti në 108 miliardë lekë, në rritje me 8.5% që nga fillimi i vitit. Edhe ecuria e investimeve publike ka qenë pozitive.
Sipas statistikave fiskale të qeverisë, për tremujorin e parë shpenzimet kapitale arritën në 10.2 miliardë lekë, në rritje me 34% krahasuar me të njëjtën periudhë të një viti më parë.
Investimet po ndjekin ecurinë pozitive të regjistruar në dy vitet e fundit. Sipas të dhënave nga Instat, formimi bruto i kapitalit fiks u rrit mesatarisht me 7.33% për katër tremujorët e vitit të kaluar.
Rritja e investimeve ka qenë një ndër shtysat kryesore të rritjes ekonomike, sidomos falë nivelit të lartë të investimeve të huaja direkte.
Sipas Bankës së Shqipërisë, vitin e kaluar ekonomia shqiptare tërhoqi gjithsej 959 milionë euro investime të huaja, në rritje vjetore me 17%.
Megjithatë, ana tjetër e medaljes është se investimet në këto vitet e fundit janë përqendruar në pak projekte madhore.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.