Investimet në Fier – Rama: Kemi projektin për ndërtimin e resortit të parë turistik
Ndërsa rruga e re e Semanit drejt detit është në përfundim të procedurave për fillimin e ndërtimit, një tjetër projekt mjaft i rëndësishëm pritet të zbatohet në Fier. Bëhet fjalë për ndërtimin e resortit të parë turistik i cili pritet ta kthejë qytetin në një pikë turistike mjaft të rëndësishme.
Lajmin e ka bërë të ditur kryeministri Edi Rama në takimin publik të ciklit kombëtar “Bashkia që duam”. Sipas tij, ky qytet ka nevojë për një dimension të fortë të industrisë së turizmit dhe duhet të kthehet në ‘vendin që qëndron’ duke bërë që emigrantët të kthehen dhe të investojnë në vendin e tyre.
“Rruga e re e Semanit drejt detit do të fillojë të ndërtohet. Është në përfundim të procedurave. Kemi bashkë me Armandon një projekt që shpresoj ta çojmë deri në fund, të ndërtimit të resortit të parë turistik që nxjerr në det, jo vetëm ata që jetojnë në Fier, por edhe turistët sepse Fieri ka nevojë për një dimension të fortë të industrisë së turizmit. Nuk mund të jetë vendi ku vetëm kalon për të shkuar në Vlorë, por duhet të kthehet në vendin ku qëndron dhe ka detin, por ka dhe zonën rurale ku ne duam t’i japim shumë më tepër shtysë agroturizmit, duke inkurajuar ata që janë në emigracion që të kthejnë kokën nga shtëpitë e tyre”, u shpreh Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.