Investimet në infrastrukturë dhe energji – Si ndahen paratë për 2021-in/ Kryesojnë rrugët dhe uji, për pak para’ për energjinë
49.8 mld lekë do të jetë buxheti i Ministrisë së Infrastrukturës dhe Energjisë për vitin 2021, duke pësuar një rritje 0.8 mld lekë nga varianti fillestar i mbërritur në Kuvend për diskutim. Tashmë dokumenti është publikuar edhe në Fletoren Zyrtare, teksa sa i takon shpenzimeve kapitale, programi më i financuar është ai i transportit rrugor, ku financimi i brendshëm është parashikuar në një vlerë prej 17.8 mld lekësh.
Për këtë program financimet e huaja kapin vlerën e 6.9 mld lekëve, ndërkohë që sektori i dytë që duket se do të ketë prioritet gjatë vitit 2021 është ai i furnizimit me ujë dhe kanalizime. Për këtë program buxheti i shtetit ka akorduar 6.5 mld lekë,, ndërkohë që 5.7 mld lekë të tjera janë financim i huaj. Menaxhimi i mbetjeve urbane gjithashtu, merr një pjesë të rëndësishme të buxhetit, me një financim total prej 3.7 mld lekësh.
Një pjesë të rëndësishme në buxhet zë edhe transporti hekurudhor, me një vlerë prej 1.7 mld lekësh, ku mbështetja buxhetore është në masën e 400 milion lekëve, ndërsa pjesa tjetrë është financim i huaj. Ndërkaq, mbështetja buxhetore në drejtim të investimeve në sektorin energjetik ka kaluar në plan të dytë, duke qenë se mbështetja për këtë program është 250 mln lekë. Në total investimet në energji kapin vlerën e 3.1 mld lekëve, pasi 2.89 mld lekë janë financim i huaj. Programi më pak i financuar është mbështetja për rrjetet e komunikacionit, pasi financimi i brendshëm është zero lekë, ndërsa i huaj 20 mln lekë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.