Investimet në shërbimin zjarrfikës – Veliaj: Pas rritjes së pagave, prioritet përmirësimi i kushteve të punës

Gjatë 2018 do të investohet  për krijimin e kushteve moderne për të gjithë punonjësit e zjarrfikëses. Kryetari i Bashkisë së Tiranës, Erion Veliaj, tha se në 2018 do të mbyllet rikonstruksioni i stacioneve, por do të ketë edhe një përmirësim në mjete, për t’iu përgjigjur në kohë qytetarëve në nevojë. Pas shumë vitesh mungesë vëmendje dhe financimi, për herë të parë Bashkia e Tiranës u ka rikthyer dinjitetin punonjësve të shërbimit zjarrfikës, duke siguruar mbështetje të vazhdueshme financiare dhe për përmirësimin e kushteve të punës.

“Më vjen mirë që për herë të parë po vëmë dinjitetin e zjarrfikësit në vend. Qyteti i Tiranës e mbajti fjalën. Besoj është e drejtë, është në dinjitetin e gjithë bashkive të tjera, që kur vjen puna tek zjarrfikësit, të jenë të parët që shpërblehen dhe kompensohen për mundin dhe sakrificën e tyre. Kjo është e vetmja mënyrë se si japim imazhin e një qyteti që për të mirët, për ata që sakrifikojnë më shumë, për ata që punojnë më fort, nuk do të kursehemi sepse garantojmë jetën dhe sigurinë e qytetit tonë”, u shpreh kreu i Bashkisë.

Këto deklarata Kryetari i Bashkisë së Tiranës, Erion Veliaj, i bëri gjatë shpërndarjes së  dhuratave për fëmijët e punonjësve të zjarrfikëses.

Entela Barjamaj/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.