Investimet në spitalet rajonale – Manastirliu: 1 mln euro për aparatura në Fier

Duke filluar nga viti  2018, në spitalin e Fierit  do të kryhen për herë të parë ndërhyrjet e kardiologjisë invazive për t’i dhënë zgjidhje me metoda bashkëkohore infarkteve akute për 400 mijë banorët e qarkut të Fierit. Ministrja e Shëndetësisë dhe Mbrojtjes Sociale Ogerta Manastirliu gjatë vizitës së zhvilloi në këtë spital u shpreh se do të investohen rreth një milion euro në aparatura.

“Një milion euro investime për angiografinë dhe aparatura të tjera biomjekësore do të fuqizojnë në vitin 2018 spitalin Rajonal të Fierit. Paralelisht, po përgatisim burimet njerëzore, mjekët e specializuar, që do të kryejnë ndërhyrjet e kardiologjisë invazive në këtë spital, duke filluar nga viti i ardhshëm, duke krijuar kështu një hartë të re të ofrimit të këtij shërbimi në vend”, u shpreh Ministrja e Shëndetësisë dhe Mbrojtes Sociale.

Gjatë takimit me stafin mjekësor të spitalit Rajonal të Fierit, Ministrja Manastirliu deklaroi se bashkë me spitalet universitare të Tiranës po hartohet një plan konkret për të nisur sistemin e patronazhimit të spitaleve rajonale.

 “Duke filluar nga muaji Janar do të plotësojmë nevojat me mjekë specialistë këtu në spitalin e Fierit dhe në të gjitha spitalet rajonale përmes një kalendari që jemi duke e përcaktuar me drejtuesit e shërbimeve shëndetësore të spitaleve universitare.Ku sistem i ri do të rrisë formimin profesional të mjekëve kudo në Shqipëri, por së pari, do të garantojë ofrimin e shërbimeve mjekësore aty ku janë nevojat”, u shpreh Ministrja Manastirliu.

Prof. Artan Goda, shef i shërbimit të Kardiokirurgjisë në QSUT u shpreh se hapja e kabinetit të ri të Hemodinamikës është një lajm i mirë jo vetëm për Fierin por për të gjithë jugun e vendit.  Ndërsa rektori i Universitetit të Mjekësisë, prof. Arben Gjata vuri theksin te rëndësia e riorganizimit të burimeve njerëzore për të shërbyer aty ku janë nevojat e komunitetit.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.