Investimet në transmetimin e energjisë – Plani i OST për 2021-in, 4.38 mld lekë, ERE nis shqyrtimin e programit
Rreth 888 mln lekë është vlera që parashikon të investojë Operatori i Sistemit të Transmetimit për vitin 2021 me fondet e veta. Ndërkohë që, rreth 3.5 mld lekë pritet të disbursohen gjatë këtij viti nga kreditë, për disa projekte që financohen me fonde të huaja. Enti Rregullatori i Energjisë ka nisur procedurat për shqyrtimin e planit të investimeve, ndonëse thekson se ky proces është tejet i vonuar për shkak se OST nuk depozitoi në kohë dokumentacionin e nevojshëm.
Referuar parashikimeve të OST, me fondet e veta për vitin 2021 do të mbulohet 40.9% e vlerës totale të kontratave të lidhura për projekte që kanë nisur apo do të nisin. Ndërkohë që, projekti më i financuar me fondet e veta është ndërtimi i nënstacionit të ri 110/35/20 kV Palasë, si dhe i linjës 110 kV. Vlera e kontratës për këtë projekt është 320 mln lekë, ndërkohë që për vitin 2021 parashikohet të financohet 50% e saj apo 160 mln lekë. Ndërkohë që, 130 mln lekë do të shkojnë për zgjerimin e sistemit të lokalizimit të defekteve në linjat e tensionit të lartë.
Ndërkaq, sa i takon financimit të projekteve me fonde të huaja, janë 1.21 mld lekë që parashikohet të shkojnë për projektin e linjës 400 KV Shqipëri-Maqedoni , ndërkohë që rreth 1 mld lekë do të disbursohen për projektin “Eficienca energjetike-programi për sektorin e transmetimit të energjisë elektrike. Ndërkaq, në vendimin e saj ERE kërkon nga OST të plotësojë mangësitë e konstatuara në drejtim të dokumentacionit, me qëllim përfundimin e procedurave të shqyrtimit të Planit të Investimeve për vitin 2021 si dhe përditësimin e “Planit të zhvillimit të rrjetit të transmetimit për periudhën 10 vjeçare 2015-2025”.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.