Investimet në turizëm – Studim për ngritjen e “marinave” në bregdetin shqiptar
Në një kohë kur vendet fqinje kanë tashmë një zhvillim të turizmit të qëndrueshëm, edhe vendi ynë po përshtat legjislacionin, si dhe po synon të jetë pjesë e këtij rrjeti.
Krahas sektorit hotelier, interesi në të cilin ka qenë i madh gjate viteve të fundit, tashmë po shikohen dhe mundësitë për investime në turizmin ujor.
Ravik Mima, këshilltar i Ministres së Turizmit, u shpreh në një intervistë për TV SCAN, se nga ky dikaster po bëhet një studim për të ngritur në bregdetin shqiptar “marina” të vogla.
“Ka një studim, i cili sapo ka mbaruar, ku ka përcaktuar se cilat janë zonat strategjike ku do të ndërtohen këto marina, dhe është një studim i cili në vazhdim do të kthehet në realitet”.
Aktualisht, në vendin tonë ekziston një port jahtesh. Por janë të shumta problematikat që kanë shoqëruar investimet në sektorin e turizmit, sidomos çështjet e pronësisë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.