Investimet në Ujësjellësin e Tiranës – BERZH do të financojë 30 mln euro për Impiantin e Bovillës dhe burimin e Gurit të Bardhë
Banka Europiane për Rindërtim dhe Zhvillim do t’i japë Shqipërisë një kredi prej 30 milionë eurosh për investime në rrjetin e Ujësjellës Kanalizime Tiranë.
BERZH njoftoi ditën e mërkurë se ka kaluar në koncept projektin me një vlerë totale prej 34 milionë eurosh. Kredia do të ndahet në dy transhe, ku për secilin do të financohen nga 15 milionë euro.
15 milionë eurot e para do të jepet menjëherë pas nënshkrimit të marrëveshjes dhe do të shërbejnë për të zgjeruar kapacitetin e Impiantit të Trajtimit të Ujit të Bovillës, si edhe për ndërtimin e një tubacioni të ri, i cili do të shpërndajë ujin nga ky impiant në pjesën veri-perëndimore të kryeqytetit përmes gravitetit.
Fondet nga trasheja e dytë do të jepen në një fazë të mëvonshme pasi UKT të përfundojë studimin për Burimet Strategjike të ujit, për të cilin BERZH ka vënë në dispozicion të UKT 75 mijë euro. Përmes këtij studimi do të përcaktohen investimet më eficiente në kosto për të adresuar problemin e mungesës së ujit.
Zgjidhje për këtë problem mund të përfshijë shfrytëzimin e burimeve të reja të ujit si ai i Gurit të Bardhë; rehabilitimin e rrjetit ujor të Tiranës; instalimin strategjik të matësave; apo një kombinim të këtyre alternativave.
Sipas BERZH, objektivi për të furnizuar Tiranën 24 orë me ujë mund të arrihet që në vitin 2021, pra në vetëm 4 vjet, nga 5 vjet që ishte deklarata fillestare e Kryetarit të Bashkisë Tiranë Erion Veliaj.
Synim tjetër i rëndësishëm është edhe reduktimi i kostove operacionale të UKT duke shfrytëzuar gravitetin për të bërë furnizimin me ujë, në vend të pompimit nënujor. Sipas nëndrejtoreshës së këtij institucioni, Evis Gjebra, kostot e pompimit të ujit zënë rreth 19% të kostove totale.
Investimet totale në ujësjellësin e Tiranës sipas Veliajt arrijnë në 220 milionë euro dhe përfshijnë gjithashtu një investim prej 50 milionë euro në sistemin e transmetimit, si edhe një investim prej 50 milionë eurosh në rrjetin e shpërndarjes.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.