Investimet për rininë – Buxheti 2018 vetëm 522 mln lekë, rinia pa zë të veçantë
522 milion lekë ose 336 milion lekë më shumë janë parashikuar në buxhetin e vitit të ardhshëm, të cilat do të shkojnë për zhvillimin e Sportit dhe Rinisë. Kjo e fundit tashmë nën përgjegjësinë e Ministrisë së Arsimit.
Sipas qeverisë, shuma prej 300 milion lekësh do të shkojë për investime kryesisht për infrastrukturat sportive, duke i kushtuar këtij të fundit një vëmendje të veçantë. Por ajo që ngelet ende e paqartë është se çfarë do të bëhet me rininë dhe pse qeveria është shprehur për një rritje investimesh deri në 200% në këtë sektor, duket se kësaj shifre nuk i përgjigjet buxheti i alokuar për vitin 2018 .
Këtë shqetësim e kanë shprehur më herët edhe Rrjeti Kombëtar për të Rinjtë në Shqipëri, të cilët theksuan nevojën për vëmendje e cila ka munguar nga ana e shtetit. Përmes një deklaratë publike ata i kërkuan qeverisë te alokojnë një buxhet specifik për të rinjtë brenda buxhetit të MASR, duke theksuar se mungesa e një buxheti për këtë kategori çon në mungesë të arsimimit, më shumë dëshirë për të emigruar si edhe mundësi për përdorues të lëndëve narkotike dhe krimeve.
Aktualisht gjatë këtij viti fondi për sportin është 186 milion lekë, ndërkohë që për rininë nuk ka pasur zë të veçantë në buxhet.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.