Investimet për shtëpitë në Greqi, rënie prej 85% krahasuar me 2008
Tregu i investimeve për shtëpinë, ka qenë në një rënie të vazhdueshme që prej fillimi të krizës ekonomike. Aktualisht llogaritet në shumën e 1.2 miliardë eurove në vit, krahasuar me shumën vjetore prej 8.11 miliardë eurosh në vitin 2008.
Rënien prej 85% e paraqet studimi i Bankës Qendrore të Greqisë.
Sipas të dhënave, reduktimi i investimeve nisi në tremujorin e parë të 2008 dhe ka ndjekur të njëjtin trend si ai i çmimeve, në rënie konstante.
Çmimet e pronave ishin rritur me 82% nga viti 2000 në 2009, por prej atëherë kanë rënë me 40%.
Studimi i Bankës tregon gjithashtu, se një pjesë e pasurisë e grekëve është investuar në prona jashtë vendit. Dhe shumica e këtyre investimeve janë financuar nga tërheqjet në depozita brenda sistemit të brendshëm të kreditit.
Rënia në tregun e shtëpive ndiqet nga një rënie edhe më e madhe në sektorin e ndërtimit. Sipas statistikave të autoritetit grek, ndërtimet e shtëpive të reja ranë me 95% krahasuar me vitin 2007.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.