Investimet publike arrijnë pikun – Kapërcim me 182 milionë euro, zgjedhjet “lirojnë” shpenzimet

Investimet publike duket se kanë arritur pikun në 10 muajt e parë të vitit, duke bërë që të regjistrohen në shifrën më të lartë të një dekade krahasuar më të njëjtën periudhë të viteve të mëparshme. Në 10 muaj janë shpenzuar 79.7 miliardë lekë apo 653 milionë euro. Sipas të dhënave të Ministrisë së Financave,  shifra është shumë më e lartë se ajo e 10-mujorit 2020, ku është bërë një kapërcim me rreth 182 milionë euro apo 38.5 për qind. Ndërsa në raport me vitin 2013, paratë e hedhura në vepra publike duket se janë dyfishuar.

Edhe pse në kushte post pandemie, buxheti i shtetit nuk është treguar i kryesor në këtë drejtim dhe duket se ndikimin kryesor e kanë dhënë zgjedhjet e përgjithshme elektorale. Po të shikojmë treguesit e investimeve muaj pas muaji, Prilli që përkon edhe me kohën kur u zhvilluan zgjedhjet mban rekord, ku janë shpenzuar rreth 14.2 miliradë lekë, shifër kjo 2 deri në 3 herë më e lartë se çdo pagesë e kryer në muajt e tjerë. Ndërsa pas perfundimit të zgjedhjeve, në Maj, nuk janë bërë pagesa.

Ndikim në rritjen e përgjithshme të shpenzimeve kapitale ka dhënë edhe procesi i rindëtimit i cili ka qenë aktiv. Deri në fund të vitit, janë parashikuar të investohen në punë publike rreth 104.3  miliardë lekë. Shqetësimin e rritjes me shpejtësi të investimeve publike që nuk lidhen me tërmetin e ka vënë në dukje së fundmi edhe Fondi Monetar Ndërkombëtar, ku shprehet se problematike në këtë pikë është mungesa e transparencës mbi tejkalimin e kostove dhe afateve fillestare.

Ndërkohë që edhe vitin e ardhshëm do ti kushtohet rëndësi këtij zëri, ku do të financohen një sërë veprash infrastrukturore në vijim përmes eurobondit 650 milionë Euro.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.