Investimi në pension – Në vitin 2016, mbi 17 mijë kontribues në fondet private

Numri i shqiptarëve që investojnë për një pension privat ka arritur në mbi 17 300 në fund të vitit të kaluar. Sipas të dhënave nga Autoriteti i Mbikëqyrjes Financiare, numri i anëtarëve në skemat private të pensioneve për vitin 2016 u rrit me afro 38%.

Ky është viti i dytë radhazi që numri i anëtarëve në këto fonde rritet me ritme të larta. Gjatë vitit të kaluar rritja kishte qenë afro 48%. Kjo dëshmon një interes dhe ndërgjegjësim në rritje të publikut rreth rëndësisë së investimit afatgjatë për një pension më të mirë. Mjedisi me norma të ulëta interesi gjithashtu mund të ketë qenë një faktor nxitës.

Fakti që depozitat bankare ofrojnë kthime shumë të ulëta i kanë shtyrë shumë qytetarë që kursimet t’i investojnë në fondet e pensioneve private. Një incentivë tjetër është përjashtimi nga taksat i këtyre kontributeve deri në shumën 200 mijë lekë në vit. Pas rritjes së tatimit mbi të ardhurat në vitet 2013 dhe 2014, në veçanti, individët me të ardhura më të larta kanë zgjedhur të investojnë në fondet e pensioneve, për të përfituar një përjashtim të pjesshëm nga taksimi.

Në volume, tregu ende ngelet në përmasa modeste, por me rritje të qëndrueshme nga viti në vit. Totali i aktiveve të fondeve të pensioneve në fund të vitit 2016 ka arritur në 1.32 miliardë lekë, me një rritje prej 42% krahasuar me një vit më parë. Aktualisht, kontributet në fondet e pensioneve private investohen pothuajse tërësisht në bono dhe obligacione të qeverisë shqiptare, pra, rreziku i investimit është teknikisht 0.

Në tre operojnë tre fonde të pensioneve private, të kontrolluar nga ndërmarrje strategjike të sistemit financiar. Për nga numri i anëtarëve, tregu udhëhiqet nga SiCRED Pensions, me 48% të totalit. Për nga totali i aktiveve, kompania më e madhe është Sigal Pensions, me afro 50% të aktiveve totale të tregut.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.