Investimi në Portin e Vlorës – Terminali i ri gati për 2 muaj, Rama: Lidhje dhe me Lungomaren
Terminali i ri i pasagjerëve në Portin e Vlorës do të jetë gati brenda 2 muajsh, ndërkohë që punimet për zgjerimin e kalatave janë kryer në masën 80%. Kryeministri Edi Rama ka inspektuar punimet që po kryhen në kuadër të investimit që kap vlerën 15 mln euro.
“Terminali i ri, me një vlerë prej 212 milionë lekë të reja, shtrihet në një sipërfaqe prej 2700 metrash katrorë. Terminali i vjetër ishte vetëm 383 metra katrorë dhe me pak ambiente shërbimi. Hyrja do jetë e gjitha me fasadë xhami termik. Do të ketë shtim të Postës së Policisë Kufitare, e cila do të ketë përpunim deri në 3 mijë pasagjerë. Besoj vitin tjetër, për sezonin e ardhshëm, bashkë me projektin e ri për zgjerimin e kalateve do të bëjmë të mundur aksesimin e sa më shumë qytetarëve. Terminali mbaron për 2 muaj”. – tha Drejtori i Portit të Vlorës Admir Malaj.
Kryeministri Rama deklaroi se porti duhet t’i shërbejë më së shumti turizmit dhe duhet të integrohet me Lungomaren, në mënyrë që të jetë i aksesushëm për të gjithë qytetarët.
“E gjithë sfida tani është të bëjmë planin rregullues të të gjithë zonës që të kthehet në një pjesë të qytetit e gjitha kjo. S’mund të jetë Porti i izoluar nga qyteti. Pastaj të vazhdojmë me fazën tjetër të Lungomares, në krahun tjetër. Por këtu duhet të kemi një plan shumë shpejt që të na lidhet Lungomare me Bulevardin”. – tha Rama.
Struktura e portit është zgjeruar dhe parashikon përpunimin e për 3-4 tragete njëkohësisht. Ndërkohë që, ministri i Infrastrukturës Damian Gjiknuri nënvizoi se po bëhen përpjekje për të futur një linjë të re tragetesh me Italinë, për të cilën një kompani shqiptare është gati që të investojë duke i dhënë kështu një impakt mjaft pozitiv turizmit në vend.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.