Investitorët, në pritje të Powell. Shefi i FED do të mbajë fjalimin vjetor në simpoziumin e bankës
Gjatë kësaj jave, investitorët do të presin me interes disa ngjarje, siç është fjala që do të mbajë shefi i Rezervës Federale. Presidenti i Bankës Qendrore, Jerome Powell mund të japë detaje mbi reagimin e FED për të manaxhuar rimëkëmbjen afatgjatë të ekonomisë, pas goditjes që mori nga pandemia e koronavirusit. Powell do të japë detaje në fjalën që do të mbajë në hapje të simpoziumit vjetor të Rezervës Federale në Kansas, ditën e enjte.
Që nga kriza e viteve 2007-2009, drejtuesit e Bankës Qendrore Amerikane e kanë shfrytëzuar këtë simpozium për të sinjalizuar ndryshime të rëndësishme të politikës monetare apo për perspektivën e ekonomisë. Për herë të parë në rreth 4 dekada, ky simpozium nuk do të zhvillohet në resortin e gjuetisë dhe të peshikimit, Jackson Hole, për shkak të pandemisë. Gjithsesi, gjatë periudhës të pandemisë tregjet e aksioneve kanë performuar shumë më mirë se ekonomia reale. Të ngjitur nga blerjet e asteteve nga Rezerva Federale, tregjet e aksioneve kanë rikuperuar të gjitha humbjet e realizuara në fillim të pandemisë dhe po gjenden pranë niveleve rekord. Një ndër pikëpyetjet kryesore, në vigjilje të takimit të shtatorit të Rezervës Federale, është nëse banka do ti zhvendosë objektivat e inflacionit në një mesatare, që do ta lejonte inflacionin të shkonte më lart.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.