Inxhinierët rusë “kapen mat” duke gërmuar Bitcoin në laboratorin sekret – Autoritetet: Do të ndiqen penalisht
Edhe pse në Rusi po debatohet ende mbi ligjin e kriptovalutave, inxhinierët në një nga laboratorët më sekretë bërthamorë kanë qenë të zënë duke i gërmuar.
Instituti i Kërkimeve Shkencore për Fizikën Eksperimentale, ku është prodhuar arma e parë bërthamore sovjetike në vitin 1949, raportoi ditën e premte “një përpjekje të paautorizuar për të përdorur pajisjet e institutit për nevoja personale në të ashtuquajturin gërmim”.
Deklarata për shtyp nuk specifikonte se kur ka ndodhur ky incident apo se sa njerëz ishin të përfshirë.
I bazuar në Sarov, një qytet i mbyllur rreth 400 kilometra larg Moskës, instituti zotëron disa prej superkompjuterëve më të fuqishëm në Rusi me një rrjet të izoluar nga interneti për arsye sigurie.
Hetuesit kanë nisur ndjekjen penale për “minatorët e varfër”, duke shtuar se raste të tilla tashmë janë shumë të zakonshme në kompanitë ruse me fuqi të larta procesimi.
Qeveria po punon për nxjerrjen e legjislacionit të saj të parë mbi kriptovalutat, ku do të prezantojë edhe rregulla për “gërmimin”, lançimin e këtyre valutave elektronike dhe tregtinë e tyre.
Rezervat e mëdha energjetike me kosto të ulët e bëjnë Rusinë veçanërisht tërheqëse për procesin e “gërmimit”, ose “mining”, ku fuqia e kompjuterëve shfrytëzohet për të zgjidhur algoritme dhe për të nxjerrë kriptovaluta.
“Të rinjtë rus tani preferojnë më shumë të marrin si dhuratë servera për gërmim, se sa diamandë”, shprehej në fillim të vitit ministri i Financave, Alexey Moiseev.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.