iPhone nuk do të tarifohet – Tim Cook: Nuk pres që Apple të përfshihet në luftën tregtare
Kreu ekzekutiv i Apple, Tim Cook, nuk pret që produkti kryesor i kompanisë të përfshihet në tensionet tregtare mes Kinës dhe Shteteve të Bashkuara.“Nuk mendoj që iPhone do të tarifohet. Bazuar në atë se çfarë kam parë dhe dëgjuar, nuk pres që të ndodhë”, tha Tim Cook. Sektori i teknologjisë dhe gjigantë si Apple, janë ndër kompanitë më të cënuara në luftën tregtare mes dy ekonomive më të mëdha në botë.
Zinxhiri i furnizimit të Apple është lidhur prej kohësh në Kinë dhe vendi përbën rrjedhën e dytë më të madhe të të ardhurave për Apple pas Shteteve të Bashkuara. Cook i tha gjatë javës së kaluar presidentit të Shteteve të Bashkuara Donald Trump, në një takim në Shtëpinë e Bardhë, se tarifat janë qasja e gabuar.
“Askush nuk do të fitojë nga një luftë tregtare. Mendoj se kur faktet janë kaq të qarta, të dy palët do ta kuptojnë dhe do të përpiqen të bashkëpunojnë”, tha Cook. Klientët e Apple përballen tashmë me çmimet më të mëdha të iPhone në historinë 10 –vjeçare të produktit, dhe kjo, pa patur tarifa. iPhone X arrin në rreth 1,000 dollarë dhe çoi çmimin mesatar të shitjes së kompanisë në rritje me 100 dollarë me bazë vjetore për tremujorin e parë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.