“IPO” më e madhe e të gjitha kohërave. “ANT” pritet të gjenerojë 34.5 mld USD, listohet në Shanghai dhe Hong Kong

Firma kineze “Ant”, do të gjenerojë 34.5 miliardë dollar në ofertën publike fillestare të dyfishtë, pasi caktoi çmimin për aksionet e veta në nisje të javës, duke e kthyer në listimin më të madh të të gjitha kohërave. Gjiganti kinez i teknologjisë financiare, deklaroi se do të ndajë emetimin e aksioneve në mënyrë të barabartë mes Shangait dhe Hong Kongut, duke emetuar 1.67 miliardë aksione të reja në çdo vendndodhje.

Aksionet e listuara në Shangai do të çmohen në 10.3 dollarë  apo 68.8 juan secili. Emetimi i 1.67 miliardë aksioneve do të gjenerojë 17.23 miliardë dollarë, apo 114.9 miliardë juan, sipas aplikimit zyrtar.  Aksionet e listuara në Hong Kong janë çmuar gjithashtu në 10.3 dollarë, apo 80 dollarë të Hong Kongut. Listimi në total do të gjenerojë 34.5 miliardë dollar, me mundësinë që kjo shifër të rritet nëse ushtrohet opsioni i mbi-ndarjes, në varësi të kërkesës.

Kjo do ta kthejë atë në ofertën publike fillestare më të madhe të të gjitha kohërave, duke kaluar mbajtësin e mëparshëm të rekordit, Saudi Aramco, që gjeneroi mbi 29 miliardë dollar. Vlera në treg e  grupit Ant, bazuar tek çmimi i ofruar, do të arrijë në 313.3 miliardë dollarë, që është më e lartë se disa nga bankat më të mëdha në Shtetet e Bashkuara, përfshirë Goldman Sachs dhe Wells Fargo.  Aksionet e kompanisë do të tregtohen në Hong Kong më 5 Nëntor, sipas formularit rregullator.

Alibaba ka rënë dakord të blejë 730 milionë aksion të klasit A, që janë aksione të denominuara në juan të kompanive kineze të listuara në bursat Brenda vendit.  Kjo do të mbajë zotërimin prej 33% të Alibaba tek kompania.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.