Irani mirëpret përpjekjet franceze për të shpëtuar marrëveshjen bërthamore

Irani përshëndet përpjekjet e Francës për të shpëtuar marrëveshjen bërthamore të vitit 2015, tha të mërkurën zëdhënësi i ministrisë së jashtme iraniane, pasi këshilltari i lartë diplomatik i Presidentit francez Emmanuel Macron vizitoi Teheranin për bisedime për të ndihmuar në lehtësimin e krizës.

Irani kërcënoi të hënën se do të vinte në punë centrifugat e çaktivizuara dhe do të rriste pasurimin e uraniumit me një pastërti deri në 20% në një lëvizje larg marrëveshjes bërthamore. Teherani i ka shtyrë nënshkruesit europianë të marrëveshjes për të mbrojtur Iranin nga sanksionet e SHBA, të cilat Washingtoni i rimponoi pas largimit nga pakti vitin e kaluar.

Agjencia shtetërore e lajmeve IRNA njoftoi se zëdhënësi i Ministrisë së Jashtme Abbas Mousavi “përshëndeti rolin e Francës në zvogëlimin e tensionit dhe zbatimin e marrëveshjes“. “Francezët janë pjesë e përpjekjeve për ta mbajtur gjallë marrëveshjen bërthamore“, tha Mousavi gjatë vizitës së Emmanuel Bonne, këshilltarit më të lartë diplomatik të Macron. (Reuters)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.