Irani njofton arrestime për rrëzimin e aeroplanit ukrainas – Presidenti i vendit: “Përgjegjësia bie mbi më shumë se një person”
Gjyqësori iranian është shprehur se ka nisur arrestimet mbi goditjen aksidentale të një aeroplani udhëtarësh ukrainas që vrau 176 njerëz menjëherë pas ngritjes nga Teherani.
Njoftimi erdhi në mes të një zemërimi të ashpër dhe protestash nga iranianët ditët e fundit mbi rrëzimin e avionit dhe përpjekjeve të dukshme nga zyrtarë të lartë iranianë për të mbuluar shkakun e përplasjes..
Irani, i cili fillimisht hodhi poshtë pretendimet se një raketë kishte rrëzuar aeroplanin, pranoi tre ditë më vonë pasi u përball me provat se Garda e saj Revolucionare kishte qëlluar aeroplanin gabimisht duke e ngatërruar një forcë e mundshme ushtarake.
Zëdhënësi gjyqësor Gholamhossein Esmaili tha se “janë zhvilluar hetime të gjera dhe disa persona janë arrestuar.” Deklarata e tij në faqen e internetit të gjyqësorit nuk thotë se sa persona ishin arrestuar dhe se asnjë emër nuk është bërë publik.
Presidenti iranian gjithashtu ka bërë thirrje që të ngrihet një gjykatë speciale për të hetuar incidentin.
“Gjyqësori duhet të formojë një gjykatë speciale me një gjykatës të rangut dhe dhjetëra ekspertë,” tha Presidenti Hassan Rouhani në një fjalim televiziv në Iran. “Ky nuk është një rast i zakonshëm. E gjithë bota do të vëzhgojë këtë gjykatë. ”
Rouhani e quajti incidentin “një gabim të dhimbshëm dhe të pafalshëm” dhe premtoi se administrata e tij do të ndiqte çështjen “me çdo mënyrë”.
“Përgjegjësia bie mbi më shumë se një person,” tha ai, duke shtuar se ata që u gjetën fajtorë “duhet të ndëshkohen”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.