Irena Beqiraj: Tatimi i integruar i të ardhurave, projektligji i hartuar që në 2015! Në 2018 nis diskutimi,ja çfarë propozon

Projekti për tatimin e të ardhurave të integruara është një projekt i planifikuar që në vitin 2015, i konkretizuar në formën e një projektligji në bashkëpunim me Fondin Monetar Ndërkombëtar. Kjo u pohua nga ish zëvëndësministrja e Financave Irena Beqiraj në emisionin “Argument” të gazetarit Enio Civici.

Duke cituar deklaratën e pak ditëve më parë të ministrit të Financave, Beqiraj tha se vitin tjetër do të fillojnë diskutimet për këtë projekt dhe nuk do të ketë aplikim të tij.

“ Mua m’u duk shumë i qartë ministri i Financave kur tha se vitin tjetër do të fillojmë diskutimin e projektit që propozon tatimin e të ardhurave të integruar. Nuk do të fillojë në 2018 por Ministria e Financave të paktën do të nisë diskutimin. Është një projektligj që është hartuar në shtator 2015 me FMN-në. Është avangardë dhe sjell një ndryshim në filozofinë e taksimit dhe ka nevojë për diskutim të gjerë” tha Beqiraj.

E sa i përket parashikimeve të draftit, Beqiraj thotë se ky projektligj forcon përdorimin e deklaratës të të ardhurave personale. Beqiraj zbuloi se aktualisht kjo deklaratë plotësohem vetëm nga rreth 6 mijë persona, pra individë që deklarojnë mbi 2 milion lekë në vit.  Kjo nismë, sipas Beqirajt, krijon mundësi për të ndërmarrë politika incentivuese, si p.sh zbritje të shpenzimeve si mund të jenë të interesit të kredive apo shpenzimeve për arsim.

Po ashtu, ky projektligj sipas saj, propozon një koncept tjetër për tatimin e bizensit ku tatim fitimi do të aplikohet vetëm në biznese të cilat kanë formën e personit juridik, pra SH.A dhe SHPK-të tatohen ndryshe nga ata që janë të regjistruar si persona fizikë.  E sa i përket diskutimeve lidhur me kompanitë e huaja që janë të regjistruara në parajsat fiskale, Beqiraj bën një propozim alternativ. Sipas saj, duhet të aplikohet një tatim i diferencuar mbi dividentin për kompanitë e huaja që vijnë në Shqipëri për të investuar por që janë të regjistruara në parajsa fiskale. Sipas Beqirajt, tatimi mbi dividentin për këto kompani mund të jetë 35% nga 15 % është aktualisht.

“Të gjitha kompanitë që i kemi problem, që nuk I dijmë origjinën dhe që fitimet dalin nga Shqipëria, le të paguajnë një tatim mbi dividendin 35% si është rasti i Republikës Çeke. Do të isha përgjithësisht kundra ndalimit total të kapitalit që vjen nga offshore. Thjesht që vjen nga një parajsë fiskale dhe nuk do të thotë se është kapital i paligjshëm” u shpreh Beqiraj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.