Isa Mustafa: Në zgjedhje shkojmë me një kandidat të ri për Kryeministër
Isa Mustafa ka thënë se LDK shkon në zgjedhje të reja me një kandidat të ri për Kryeministër. Nuk ka dhënë emër por ka thënë se ai nuk do të jetë përsëri kandidat i LDK-së si udhëheqës i Qeverisë.
“Në bisedë me bashkëpunëtorët e ngushtë kemi vendosur që në mandatin e ardhshëm të kemi një Kryeministër tjetër”, ka thënë Kryeministri në ikje Mustafa, shkruan gazeta “Ekspres” .
“Sepse ne duhet të hapim rrugë në LDK për kuadro. Duhet të hapim rrugë për njerëz të ri. Unë do të ulem me Nënkryetarët e Partisë, me Sekretarin, me Kryetarët e Degëve dhe do të dalim me propozim se kush do të jetë Kryeministër i ardhshëm i Republikës nga LDK-ja”- ka shtuar ai.
Gjatë fjalës së tij, Mustafa ka folur fjalë të mira për ministrat dhe deputetët e LDK-së në këtë mandat.
“Të gjithë mendjen e kemi te situata që po ballafaqohemi. Në qoftë se do të më pyetni mua se sikur të ktheheni në vitin 2014, unë ju them se do të vendosja të njëjtën. Koalicionin e kemi bërë për Kosovën dhe për të mirën e Kosovës. Ju siguroj se kemi dhënë shembull të mirë se si qeveriset Kosova”, ka shtuar ai.
Mustafa është shprehur se LDK e ka mundur krimin, korrupsionin, papunësinë.
“Asnjëri prej nesh s’ka punuar për interesa private”, ka shtuar ai.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.