Ish-kreu i Doganave të Kosovës, Lulzim Rafuna merr detyrën si këshilltar në kabinetin e kryeministrit në Shqipëri
Ish-kreu i doganave të Kosovës Lulzim Rafuna ka marrë tashmë zyrtarisht detyrën si këshilltar i kryeministrit të Shqipërisë, Edi Rama. Lajmi është bërë publik në rrjetet sociale nga vetë kryeministri Rama.
“Faleminderit Lulzim Rafunës që pranoi rolin e këshilltarit në kabinetin e kryeministrit të Shqipërisë, pas një eksperience të suksesshme në drejtimin e doganave të Kosovës” shkruan Rama në rrjetet sociale. Rafuna do të këshillojë qeverinë shqiptare për reformat në sistemin tatimor e doganor.
Lulzim Rafuna ka drejtuar Doganat në Kosovë në vitin 2013, pasi më herët kishte mbajtur detyrën e zëvëndësdrejtorit të Përgjithshëm, po në sistemin doganor.
Referuar raportimeve mediatike në Kosovë, Rafuna është me profesion jurist dhe i takon gjeneratës së parë të oficerëve doganorë të certifikuar në vitin 2000. Krahas detyrave në sistemin doganor të Kosovës, Rafuna ka punuar edhe në ministrinë e Financave të Kosovës, në sektorin juridik.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.