“Ish-minatorëve tu falen borxhet”, Projektligji i Beqajt: “Po marrin 50-75% të pensionit, s’plotësojnë nevojat jetësore”
Deputeti Ilir Beqaj kërkon faljen e borxheve që ish-minatorët i kanë Institutit të Sigurimeve Shoqërore, si pasojë e përfitimit të pensionit, por që njëkohësisht kanë zhvilluar aktivitet ekonomik si të punësuar ose të vetëpunësuar. Sipas legjislacionit në fuqi, këta ish-punonjës të nëntokës e kanë të ndaluar të punojnë, nëse trajtohen me pagesë nga shteti, por në vërtetë ka rezultuar se një pjesë e tyre kanë përfituar të ardhura nga paga, çka ka bërë që të penalizohen nga ISSH.
Më konkretisht, për likujdimin e detyrimeve të krijuara nga mosdeklarimi i punësimit dhe tërheqja e paligjshme e këstit të përfitimit në periudha të mëparshme, kjo kategori merr 50-75% të përfitimit mujor, çka sipas Beqaj bën që të mbeten në kushte të pamjaftueshmërisë së të ardhurave kundrejt nevojave jetësore. Sipas relacionit, që shoqëron projektligjin, mosdeklarimi i ndalimit të përfitimit për periudhën e punësimit ishte si pasojë e gjendjes ekonomike të tyre apo edhe e pamjaftueshmërisë së përfitimeve, kryesisht për trajtimet e veçanta financiare.
Ndërkohë që, sipas Beqajt, nëpërmjet faljes së detyrimeve, synohet të normalizohet situata e tyre financiare. Sipas projektligjit propozohet që brenda 3 muajve, pas hyrjes në fuqi të ligjit, ISSH të fshijë detyrimet e përllogaritura nga sistemi, ndërkohë që brenda 5 muajve Ministria e Financave dhe ISSH të zbatojnë të gjitha procedurat administrative të evidentimit të detyrimeve të falura.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.