ISHTI ndëshkon 5 subjekte që tregtojnë karburant– Gjoba deri në 2 milionë lekë të reja
Inspektorati Shtetëror Teknik dhe Industrial, gjatë inspektimeve të muajit Janar, ka gjetur 5 subjekte në shkelje, të cilat i ka ndëshkuar me urdhër ndalesë dhe masa administrative nga 150 mijë deri në 2 milionë lekë.
Fokusi i kontrolleve të kryera ishte zbatimi i dispozitave të ligjit për tregtinë e karburanteve dhe ligjit të sigurisë së punës të pajisjeve dhe instalimeve elektrike.
Dy prej bizneseve gjenden në qytetin e Shkodrës, një në Tiranë, një në Kamëz dhe një në Korçë.
Gjoba më e lartë prej 2 milionë lekësh i ka takuar subjektit në Kamëz, të cilit i mungonte përcaktimi i tregtuesit të nënprodukteve të naftës.
Një prej subjekteve në Shkodër është gjobitur me 500 mijë lekë të reja për mbushjen e bombolave për përdorim familjar, çka bie në kundërshtim me ligjin sipas licencës që ai zotëronte.
Ndërmarrja në Tiranë është gjobitur me 150 mijë lekë për shkak të shkeljes së rregullores së sigurimit dhe kushteve të sigurisë teknike.
Ndërkohë, dy subjektet e tjera janë ndëshkuar për mungesë dokumentacioni me gjoba 500 mijë dhe 1 milion lekë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.