Italia do të qëndrojë e “mbyllur”/ Rritet numri i të vdekurve nga virusi. 3 rajone do vazhdojnë karantinën
Shkollat dhe universitetet do të qëndrojnë të mbyllura për javën e dytë radhazi në 3 rajone të Italisë, në përpjekje për të përmbajtur përhapjen më të keqe të koronavirusit në Europë, duke larguar shpresat për rikthim në normalitet. Vendimi u morr ndërkohë që numri i vdekjeve u rrit me 8 në 29 në total dhe numri i të infektuarve arriti në 1,128, ku shumica ndodhen në rajonet e pasura të Lombardisë, Venetos dhe Emilia Romagnas.
Përveç kostove njerëzore, qeveria është shqetësuar gjithashtu për ndikimin ekonomik, ndërkohë që institucionet vendase paralajmëruan se kriza do t’i heq ekonomisë 1-3% në gjysmën e parë të vitit. Në përpjekje për të ndaluar epideminë super-ngjitëse, qeveria ndaloi mbledhjet në publik javën e kaluar në pjesën më të madhe të Italisë së Veriut. Virusi është përqëndruar në vende relativisht të vogla dhe njerëzit shpresonin për heqje të karantinës në zona të tjera. Megjithatë, qeveria deklaroi se shkollat dhe universitetet në 3 rajonet më të ndikuara do të qëndrojnë të mbyllura të paktën deri më 8 Mars. Vendet fqinje të Italisë po marrin gjithashtu masa për të ndaluar përhapjen e epidemisë.
Franca ndaloi përkohësisht mbledhjet në public me mbi 5,000 persona, ndërsa Zvicra ndaloi eventet që tërheqin mbi 1,000. Kabineti Italian premtoi masa për të ndihmuar bizneset në zonën e kuqe dhe premtoi mbështetje më të gjerë për kompanitë e ndikuara në ditët e ardhshme. Një nga sektorët më të goditur është turizmi, ndërkohë që hotelet kanë raportuar një valë të anulimeve në të gjithë vendin. Bota e sportit në Itali është ndikuar gjithashtu, ndërkohë që 5 ndeshje të serisë A janë shtyrë si pasojë e koronavirusit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.