Italia heq paranë e dorës – Risia e fundit është karta unike për identifikim dhe pagesa elektronike
Në emër të luftës kundër evazionit fiskal, Italia po përgatit një projekt thjeshtësimi që mund të bëjë përdorimin e pagesave elektronike më pak të komplikuar edhe për pjesën e popullatës më të ndjeshme, siç janë të moshuarit. Projekti nën studim i Qeverisë quhet “karta unike” dhe është nënsekretari i Ministrisë së Ekonomisë, Alessio Villarosa (M5S), i cili ka deklaruar për Il Sole 24 Ore se çfarë do të përmbajë dhe si do të funksionojë. Në praktikë do të jetë një kartë që do të kryejë shumë funksione dhe që mund të përdoret gjithashtu edhe për pagesa elektronike.
Projekti është që të bashkojë një seri dokumentesh që tani ndahen në karta ose dokumente të ndryshme e të veçanta në një të vetëm. “Do të jetë një revolucion i vërtetë: karta unike,” shpjegon Villarosa, “do të përmbaj kartë identiteti, kartën shëndetësore, identitetin digjital dhe mundësinë e aktivizimit të një llogarie pagese në çdo bankë ose zyrë postare”.
Një operacion i tillë kërkon një punë të madhe në rakordimin e disa aspekteve dhe problematikave që mund të hasen gjatë përdorimit dhe aktivizimit të saj. E para nga pikëpamja teknologjike dhe më pas ekziston një aspekt jo sekondar që është respektimi i mbrojtjes së të dhënave personale sepse një seri e tërë e të dhënave të ndjeshme do të përqendrohej në një kartë të vetme.
Përveç sistemeve të stimulimit fiskal që janë duke u studiuar për tregtarët dhe konsumatorët, karta unike do të bëjë të mundur që të procedohet në një mënyrë më pak të komplikuar dhe më të shpejtë me pagesat dhe faturat elektronike. Në shumë qytete zyrat e regjistrave pranojnë vetëm pagesa elektronike dhe detyrimi mund të përgjithësohet për të gjithë administratën publike, përfshirë kompanitë që ofrojnë shërbime publike. (IS24O)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.