Italia kalon “mamanë e të gjitha reformave” – Do thjeshtësohen tenderat, zyrtarët, më pak frikë nga firma
Qeveria italiane aprovoi një paketë masash në të gdhirë të së martës, të cilat synojnë t`i japin një shtysë ekonomisë së tretë më të madhe të eurozonës, e cila prej vitesh vuan një stanjacion të rrezikshëm. Dekreti i thjeshtësimit u aprovua kështu pas javësh të tëra përplasjesh dhe negociatash politike. Paketa e re është konsideruar nga Kryeministri Giuseppe Conte si “mamaja e të gjitha reformave”. Qeveria synon që kjo paketë të rindezë motorët e ekonomisë e cila ra në gjunjë nga kriza e shkaktuar nga covid-19.
Parlamenti Italian votoi në orët e vona të natës versionin paraprak të paketës, ndërkohë që detajet do të qartësohen më vonë. Ligji i cili përmban rreth 174 faqe përfshin sektorë të ndryshëm, që nga prokurimet publike, te dixhitalizimi, rregullat për rritje të kapitalit në koorporata si dhe rritje të përgjegjësisë penale për nëpunësit publik. Në bazë, ligji synon të thjeshtësojë procedurat e tenderimeve për vlera të vogla. Ligji do të hyjë në fuqi pas 12 muajve. “Ne duam të heqim atë që njihet si frika e firmës”-deklaroi Conte pak ditë më parë. Shumë projekte publike ngecin për shkak të frikës së nëpunësve për akuza që mund t`iu ngrihen për shpërdorim të detyrës. Paketa e re u heq edhe kompetencat kryetarëve të bashkive për të ndaluar instalimin e antenave 5G.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.