Italia, në rënie të “jashtëzakonshme”. Ekonomia tkurret me 12.4% në T2, gjatë periudhës së karantinës
Ekonomia e Italisë u tkurr me 12.4% në tremujorin e dytë nga i pari, sipas të dhënave fillestare, ndërkohë që aktiviteti ekonomik preku fundin gjatë pandemisë së koronavirusit. Rënia tremujore e produktit të brendshëm bruto në ekonominë e tretë më të madhe të Eurozonës ishte e jashtëzakonshme, sipas zyrës kombëtare të statistikave ISTAT. Me bazë vjetore, ekonomia u tkurr me 17.3% në tremujorin e dytë.
Analistët prisnin një tkurrje me 15% me bazë tremujore dhe me 18.7% nga e njejta periudhë një vit më parë. INSTAT deklaroi se të gjithë segmentët e ekonomisë janë dëmtuar, pa dhënë detaje. Agjencia rishikoi gjithashtu në rënie tremujorin e parë të këtij viti, duke dhënë një normë prej 5.4%. Italia ka qenë një nga vendet më të goditura nga Covid-19 në Europë, duke regjistruar mbi 35,000 vdekje që kur u shfaq sëmundja në fund të Shkurtit. Në përpjekje për të ndaluar infeksionin, qeveria prezantoi masa strikte të karantinës, duke ndaluar tregtinë, udhëtimin dhe detyruar shumë biznese që të mbyllen në fillim të Marsit. Karantina u hoq në mënyrë graduale më 4 Maj dhe pjesa më e madhe e ekonomisë po vazhdon të ndiejë efektin. Qeveria italiane ka lajmëruar stimuj me velrë 75 miliardë euro për të ndihmuar firmat dhe familjet që të tejkalojnë krizën.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.