Italia në zgjedhje të parakohshme? – Renzi: Në një ditë me Gjermaninë. Tregjet janë pro
Ish-kryeministri italian, Matteo Renzi, i cili mban edhe postin e kryetarit të partisë në qeveri, kërkoi që zgjedhjet e ardhshme parlamentare në vend të mbahen në të njëjtën ditë me ato në Gjermani, pasi sipas tij kjo bën sens nga një këndvështrim europian.
Por, ndërkohë që zgjedhjet në Gjermani do të mbahen më 24 Shtator, ato në Itali parashikohen për në Maj të vitit të ardhshëm. Gjithsesi, spekulimet se, italianët do të votojnë në vjeshtë të këtij viti, janë rritur ndjeshëm që prej kohës kur Matteo Renzi dha dorëheqejn nga posti i kryeministrit.
Presidenti italian, Sergio Mattarella, i vetmi person që ka fuqinë për të shpërbërë parlamentin dhe për të thirrur zgjedhje të parakohshme, ka deklaruar se, kjo mund të ndodhë vetëm pasi parlamenti të ketë votuar ligjin e ri elektoral. Renzi ndërkohë, shtoi se, partia e tij nuk do të kërkojë zgjedhje të parakohshme, por se nga ana tjetër nuk është kundër kësaj ideje.
Ekspertët e tregjeve dhe institucionet e vlerësimit janë në favor të zgjedhjeve të përgjithshme. Pavarësisht se mund të prodhonin atë që quhet parlament i varur, pra mungesën e një mazhorance qeverisë, këto zgjedhje mund të eliminonin një sërë rreziqesh aktuale.
Mundësia e mbajtjes së zgjedhjeve në Itali dhe Gjermani në të njëjtën ditë është gjithashtu pozitive për tregjet, pasi periudha e luhatshmërisë do të ishte më e kufizuar, duke frenuar ndonjë kolaps të mundshëm.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.