Italia, një vit me “populistët” – Ekonomia në “zonë të rrezikut”. Kërcënon gjithë Europën
Një vit pas zgjedhjeve në Itali, ku populistët morën pushtetin, perspektiva ekonomike është përkeqësuar dhe po jep paralajmërime për të gjithë Europën.
Ekonomia e tretë më e madhe në Eurozonë, pati një rënie të madhe në manifakturë gjatë Shkurtit dhe të dhënat për ndjesinë ekonomike treguan se recesioni do të zgjasë përgjatë 2019-ës. Komisioni Europian ka kritikuar përsëri politikat e Qeverisë dhe ka bërë të ditur se do të ketë ndikime për të gjithë Europën.
Vendi i varur nga eksportet është ndikuar gjithashtu nga ngadalësimi botëror, që ka prekur të gjithë Europën.Vështirësitë e Italisë, janë përkeqësuar nga plani i shpenzimeve i Qeverisë populiste, që synon të arrijë premtimet e shtrenjta të fushatës. Për rrjedhojë, ekonomia pritet në stanjacion këtë vit, papunësia me një normë 2-shifrore dhe nuk do të ketë progres në uljen e borxhit. Sipas ekonomistëve, ka shumë mundësi që ekonomia italiane të tkurret përsëri në tremujorin e parë 2019.
Kryeministri , Giuseppe Conte, që mori detyrën pas fitores së populistëve më 4 Mars 2018, i ka hedhur poshtë paralajmërimet. Komisioni Europian, që po vazhdon betejën me Romën mbi buxhetin, kritikoi përsëri Qeverinë gjatë muajit duke thënë se veprimet që po ndërmerr përbëjnë rrezik dhe kalojnë kufijtë italianë. Paralajmërimet e Komisionit për përhapje të trazirave italiane nuk kanë qenë të vetme, ndërkohë që edhe ministri francez i Financave, Bruno Le Maire, ka thënë se “nuk duhet nënvlerësuar recesioni italian”.
Agjencia e Statistikave, Instat, publikoi gjatë javës një rritje të papunësisë për muajin Janar dhe deklaroi se ekonomia u rrit me 0.9% në të gjithë 2018-ën, në rënie nga 1.6% rritje një vit më parë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.