Italia rekomandon Shqipërinë, Ansa: Një ndër 5 destinacionet kryesore për t`u vizituar në Shtator

Agjencia shtetërore e lajmeve në Itali, “Ansa”, i këshillon italianëve që të vizitojnë Shqipërinë, duke e klasifikuar vendin tonë si një ndër 5 destinacionet më të mira globale për t`u vizituar edhe gjatë Shtatorit.

“Nga disa, Shqipëria konsiderohet si Kroacia e re, dhe ky është një krahasim jo i ekzagjeruar, pasi Shqipëria është e pasur me histori, kulturë, plazhe fantastike dhe një natyre luksi”, kështu e nis Ansa përshkrimin e Shqipërisë.

“Shtatori është periudha ideale për ta vizituar, pasi mund të vizitohen 460 kilometra vijë bregdetare pa mbipopullimin e verës dhe me një klimë të freskët mesdhetare”, vijon më tej shkrimi.

Ndër të tjera, agjencia shtetërore e lajmeve në Itali sqaron se, në Shqipëri ke mundësi të zgjedhësh, duke filluar që nga plazhi, nga Velipoja në Ksamil ka tipologji të ndryshme.

Vendet e tjera të këshilluara janë Buenos Aires, Korfuzi, Zanzibari dhe Marakeshi në Marok. Gjatë viteve të fundit, e sidomos gjatë këtij viti, turistët italianë në vendin tonë janë rritur ndjeshëm, dhe shifrat e vërtetojnë më së miri këtë tendencë të re.

Një ndikim të madh në këtë preferencë të re të italianëve kanë dhënë padiskutim edhe mediat, që kanë promovuar masivisht turizmin shqiptar.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.