Italia do të votojë më 4 Mars – Pritet parlament i “varur”, kërcënon lëvizja euroskeptike “5 yjet”

Presidenti italian Sergio Mattarella, nënshkroi një dekret ditën e Enjte për të shpërndarë parlamentin, duke nisur rrugëtimin e vendit drejt zgjedhjeve të përgjithshme më datë 4 Mars të vitit që vjen, që sipas analistëve, me shumë gjasa do të rezultojë në një parlament të “varur”.  Ndërkohë që fushata e zgjedhjeve ka nisur në mënyrë zyrtare, sondazhet tregojnë se asnjë parti nuk ka gjasa të fitojë mazhorancën absolute në parlament.

Ekzistojnë shqetësime se votimi do të rezultojë në skenarin më të keq të mundshëm, që është një parlament i varur me destabilitet politik dhe trazira ekonomike. Sipas sondazheve, Partia Demokrate, që është aktualisht në pushtet, e drejtuar nga ish-kryeministri dhe lideri i qendrës së majtë, Matteo Renzi, pritet të marrë 25% të votave.  Koalicioni i qendrës së djathtë i ish-kryeministrit Silvio Berlusconi, që përbëhet nga Forza Italia, Lega Nord dhe Fratelli d’italia, ka një popullaritet të kombinuar prej mbi 35%.

Partia që kryeson sondazhet e vetme, është lëvizja populiste 5-yjet, që pritet të marrë 27.5% të votave.  Euroskeptikët po rifitojnë mbështetje në spektrin politik të Italisë.  Lëvizja 5-yjet refuzon tregtinë e lirë, kufizon sistemin financiar, mbron politikat me kosto zero dhe refuzon formimin e koalicionit me partitë e tjera. Ata kanë bërë thirrje gjithashtu për referendum, që Italia të dalë nga Eurozona.

Megjithatë, duke parë ngurrimin e tyre për të formuar koalicion, lëvizja 5-yjet,  nuk ka gjasa të krijojë kabinetin si parti e vetme, pavarësisht se pritet të fitojë pjesën më të madhe të vendeve në parlament.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.