Italia zgjeron masat e karantinës. Fut më shumë rajone në zonë të kuqe, prej mbikapacitetit të spitaleve

Masat e kufizimeve të koronavirusit do të zgjerohen në disa rajone të Italisë, ndërkohë që Toskana dhe Kampania do të përcaktohen si zona të kuqe me rrezik të lartë, sipas Ministrisë së Shendetësisë. Italia ka regjistruar një numër rekord prej mbi 40,902 raste në 24 orët e fundit, duke e çuar totalin në mbi 1.1 milionë.  Në përpjekje për të limituar përhapjen, qeveria krijoi një sistem me 3 nivele javën e kaluar, me shkalla të ndryshme të kufizimeve në çdo zonë.

Fillimisht qeveria vendosi 4 rajone në zonë të kuqe, 2 në zonë portokalli dhe pjesën tjetër në zonë të verdhë, me rrezik të moderuar. Autoritetet ndryshuan mënyrën e krijimit të zonave në nisje të javës dhe e rishikuan përsëri në fundjavë, pasi studiuan normen e infeksionit dhe kapacitetin e spitaleve. Toskana dhe Kampania do të shtohen në zonën e kuqe, së bashku me rajonet e pasura të Veriut; Lombardia, Piemonte dhe Valle D’Aosta. Njerëzit në këto zona lejohen vetëm të dalin nga shtëpitë për punë, arsye shëndetësore, apo emergjenca. Baret restorantet dhe shumica e dyqaneve, do të mbyllen.  Nëntë rajone do të qëndrojnë në zonën e ndërmjetme portokalli. Dhe vetëm 5 qëndrojnë në zonën e verdhë, përfshirë Lazion dhe Veneton.  Kampania është kthyer në zonë të kuqe nga e verdhë, pasi mjekët paralajmëruan se sistemi shëndetësor është pranë kolapsit.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.