Italianët “dashurohen” me Shqipërinë – “IlMessaggero”: E zgjodhën 5.7% e turistëve italianë gjatë verës

Shqipëria është përballur me një boom turizmi gjatë këtij viti, thonë mediat italiane, që veç shifrave zyrtare i referohen kështu edhe dashurisë më të re të italianëve për të kaluar pushimet e verës.

“ilmessaggero”, e fakton edhe me shifra këtë “boom” turizmi në vendin tonë, duke shkruar se 5.7% e italianëve kanë zgjedhur pikërisht Shqipërinë për të kaluar pushimet  e tyre të verës, një normë kjo realitivisht e lartë për  një vend si Shqipëria.

Pra, perceptimi i përgjithshëm, se italianët janë dyndur masivisht në Shqipëri, sidomos gjatë këtij viti, duket se përligjet edhe nga shifrat. Sipas prestigjiozes italiane, interesi i lartë i turistëve italianë për vendin tonë, vërehet edhe me kërkimet e shumta në internet si dhe me interesin e lartë në portalet e prenotimeve dhe ato të hoteleve.

Shkrimi vijon më tej, duke dhënë edhe motivet se përse italianët kanë filluar ta duan kaq shumë Shqipërinë. Raporti çmim/cilësi vlerësohet si një ndër shtysat kryesore. Madje, atë që shumëkush ndër ne e konsideron si problemin numër një të turizmit në vendin tonë; shërbimin, duket se italianët e cilësojnë si mjaft të mirë.

Atraksionet e shumta turistike, plot 3390 të tilla vlerësohen si një tjetër pikë e fortë e turizmit shqiptar, në menunë gjigande të ofertave për  muajt e verës, jo vetëm në Europë, por edhe më gjerë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.