Italianët, më të vetmuarit në Europë – Në rajon është Maqedonia problematikja
Vetmia, veçanërisht në vendet e zhvilluara, është në rritje vit pas viti, jo vetëm tek moshat më të mëdha, por edhe tek të rinjtë. Disa njerëz kërkojnë të jenë të izoluan, por janë të paktë ata që zgjedhin të jenë vetëm.
Të pranosh të qenurit i vetmuar është shumë e vështirë, por janë të shumtë njerëzit që jetojnë në Europë, të cilët tregojnë në sondazhin e kryer nga Eurostat, se nuk kanë askënd se kujt mund t’i kërkojnë ndihmë.
Plot 6% e popullsisë së Bashkimit Europian tregon se nuk kanë askënd pranë në raste të vështira. Më të vetmuarit gjenden në Itali dhe Luksemburg, shtete ku 13% e njerëzve mbi 16 vjeç ndihen të pashpresë për ndihmë.
Situata është shumë më mirë në Republikën Çeke, Finland, Sllovaki dhe Suedi, ku vetëm 2% e popullsisë shprehet se ndihen të vetmuar.
Ndërsa për pyetjen “A keni dikë me të cilët diskutoni gjërat personale?”, 6,1% e popullsisë së Europës përgjigjet negativisht. Franca ka përqindjen më të lartë të njerëzve të izoluar në këtë aspekt, ndjekur nga Italia me 12%.
Kur vjen puna tek izolimi social, duket se të ardhurat kanë një efekt të konsiderueshëm, ku shifra ishte dyfish më e lartë tek europianët me të ardhura më të ulëta, se sa tek ata me të ardhura të larta. Pra, në këtë rast shprehja “Paraja nuk të bën të lumtur” duket se nuk vlen.
Në anketim janë përfshirë edhe Serbia e Maqedonia, dhe rezulton se këta të fundit renditen mes shteteve me shifrat më negative. Rreth 1 në 10 maqedonas ndihen të vetmuar, ndërsa në Serbi, raporti qëndron brenda mesatares së Bashkimit Europian.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.